Zëvendësministri i Mbrojtjes, Admir Shabani, sot në Klubin e Deputetëve, me fjalimin e tij hapi Konferencën Shkencore Ndërkombëtare me titull „Multipolariteti dhe Siguria e Qëndrueshme në Evropë“.
Në fjalën e tij përshëndetëse, Shabani theksoi se ndryshimet gjeopolitike dhe shfaqja e rreziqeve të reja të sigurisë, kërcënimeve hibride, sfidave kibernetike, si dhe pasojat e konflikteve rajonale dhe globale, hapin çështje thelbësore për të ardhmen e sigurisë në Evropë, të cilat kërkojnë një qasje që tejkalon kufijtë kombëtarë.
“Si vend anëtar i NATO-s dhe shtet që kontribuon aktivisht në sigurinë rajonale dhe evropiane, ne vazhdojmë të investojmë në zhvillimin e kapaciteteve tona mbrojtëse, por njëkohësisht edhe në dije, shkencë dhe potencialin njerëzor si parakushte thelbësore për stabilitet afatgjatë”, theksoi zëvendësministri.
Ai shtoi se partneriteti ndërmjet institucioneve të mbrojtjes dhe komunitetit akademik është i një rëndësie të jashtëzakonshme dhe se pikërisht kërkimet shkencore, mendimi kritik dhe shkëmbimi i ideve do të kontribuojnë në krijimin e politikave më cilësore dhe përgjigjeve më efikase ndaj sfidave bashkëkohore të sigurisë.
Konferenca Shkencore Ndërkombëtare u organizua nga Fakulteti Filozofik – Instituti për Siguri, Mbrojtje dhe Studime të Paqes, në bashkëpunim me Ministrinë e Mbrojtjes, dhe përfshiu pjesëmarrës nga Turqia, Kroacia, Letonia dhe Serbia.
