Delegacioni i Armatës dhe Ministrisë së Mbrojtjes që ndodhet për vizitë në Vermont, SHBA, i udhëhequr nga Shefi i Shtabit të Përgjithshëm, gjeneralmajor Sashko Lafçiski, i shoqëruar nga Sekretarja Shtetërore në Ministri, Elizabeta Çupovska Ristova, gjatë ditës së djeshme realizoi takim me guvernatorin e këtij shteti amerikan, Fil Skot, në të cilin mori pjesë edhe komandanti i Gardës Kombëtare të Vermontit, gjeneralmajor Gregori Najt.
Gjatë takimit u diskutua për përfitimet nga Programi i Partneritetit që prej më shumë se tre dekadash realizohet përmes një game të gjerë aktivitetesh, siç janë: ushtrime dhe stërvitje të përbashkëta, konferenca, vizita në baza ushtarake, qendra arsimore dhe institucione në SHBA, seminare, etj. U theksua gjithashtu kontributi i jashtëzakonshëm i komandantit të Gardës Kombëtare të Vermontit, gjeneral-major Knight, i cili gjatë mandatit të tij ka luajtur rol kyç në zhvillimin dhe suksesin e këtij programi.
Në kuadër të aktiviteteve, delegacioni maqedonas realizoi takim me komandantin e Universitetit “Norui”, gjeneral brigade Uilliam MekKola gjatë vizitës në këtë institucion të arsimit të lartë ushtarak. Në fokus të bisedës ishte rifreskimi i programit të shkëmbimit të studentëve midis Armatës dhe Universitetit. Ky program ka luajtur rol të rëndësishëm në forcimin e partneritetit mes dy vendeve dhe në mbështetjen e zhvillimit profesional dhe akademik të liderëve të ardhshëm ushtarakë. Ai mbetet mekanizëm kyç në përpjekjet për thellimin e lidhjeve institucionale dhe përparimin e ndërveprueshmërisë.
Gjatë ditës, delegacioni vizitoi edhe Qendrën Rajonale për Gatishmëri dhe Teknologji Rajonale “Northfild”, ku u prezantua angazhimi i kësaj qendre në fushën e operacioneve informative dhe sigurisë kibernetike në vendin tonë.
Në ditët në vijim, delegacioni do të marrë pjesë në disa prezantime dhe vizita në institucione dhe kapacitete me interes të përbashkët.
