Sot, në kuadër të panairit të industrisë ushtarake në Stamboll – IDEF 25, ministri i mbrojtjes Vllado Misajllovski, së bashku me ministrin e punëve të brendshme Pançe Toshkovski, u takuan me ministrin e mbrojtjes kombëtare të Republikës së Turqisë, Jashar Gjuler.
Në takim u theksua bashkëpunimi i gjatë dhe aktiv në fushën e mbrojtjes, i bazuar në vizionin e përbashkët për ruajtjen e stabilitetit dhe sigurisë së rajonit, si dhe zhvillimin e të dyja vendeve. U konkludua se partneriteti do të vazhdojë të forcohet përmes shkëmbimit të njohurive dhe ekspertizës në të gjitha fushat.
Ministri Misajllovski foli edhe për pajisjet e fundit dhe të sofistikuara që u bënë pjesë e arsenalit të Armatës – obusat “Boran” të prodhimit turk, të cilat janë pjesë e baterisë së deklaruar të artilerisë së Grupit të Batalionit të Këmbësorisë së Lehtë, duke theksuar se “Armata maqedonase është e bindur në cilësinë e industrisë ushtarake turke” dhe shprehu falënderime për mbështetjen e vazhdueshme nga Turqia, veçanërisht në zhvillimin e kapaciteteve ushtarake.
„ Armata maqedonase po kalon nëpër procesin më intensiv të modernizimit dhe pajisjes deri më tani, që padyshim është një investim në sigurinë e qytetarëve maqedonas. Një Armatë më e fortë do të thotë edhe një mbrojtje kolektive më e sigurt dhe më e qëndrueshme në NATO,” tha ministri.
Mbrëmë, në kuadër të vizitës në Turqi dhe pjesëmarrjes në panairin e industrisë ushtarake IDEF 25, ministri Misajllovski u takua edhe me presidentin e Agjencisë për Industrinë e Mbrojtjes të Turqisë, Haluk Gjorgjun, me të cilin diskutoi për zhvillimin e industrisë ushtarake dhe nevojën për investime të shtuara në këtë fushë, si një mënyrë për të forcuar sigurinë e aleatëve.
Industria ushtarake turke është me interes për mbrojtjen maqedonase, veçanërisht duke pasur parasysh se Armata tashmë është pajisur me gjashtë obusa të reja 105 mm dhe pajisje shoqëruese nga kompanitë “Boran” dhe “Aselsan”, të cilat u promovuan kohët e fundit për publikun maqedonas.
