Денеска во касарната Илинден во Скопје, се одржа свеченост по повод одбележувањето на осум годишнината од отворањето на Командата на Балканските медицински наменски сили – BMTF, со постојано седиште во Скопје, на која присуствуваа заменик началникот на Генералштабот на Армијата, генералот Азим Нуредин, државниот секретар во Министерството за одбрана Елизабета Чуповска Ристова, претставници од министерството и Генералштабот, амбасадори и одбранбени аташеи од земјите членки на оваа регионална иницијатива. Северна Македонија претседава со Управниот одбор на оваа организација и во тоа својство на денешната свеченост се обрати државниот секретар Чуповска Ристова, која потенцира дека регионалната соработка е најважната алатка за одржување и развој на меѓусебните односи и дека оваа Иницијатива е успешна приказна.
„Со заедничка волја и посветеност ја изградивме оваа респектабилна меѓународна организација, обединувајќи ги земјите од регионот. BMTF воспостави нови стандарди не само на Балканот туку и пошироко“, рече Чуповска Ристова и додаде дека „Успехот на BMTF и неговите проширени активности не обединуваат и не прават посилни“.
На свеченоста свое обраќање имаше и командантот на BMTF, полковник Вељко Милиќ кој пред присутните истакна дека од самите почетоци на соработка и воспоставувањето на Командата, огромна помош за развојот на оваа Иницијатива е по заслуга и на земјите партнери на BMTF, Кралството Норвешка и Соединетите Американски Држави, а од неодамна и Европската Унија со алоцирање на 6 милиони евра за подобрување на медицински капацитети.
Тој додаде дека целта на оваа организација е да му помогне на цивилното население во случај на природни и катастрофи предизвикани од човекот и воедно да се достигнат стандардите на НАТО, ЕУ и ОН за да се воспостави интероперативност на воено медицинските служби на земјите од Западен Балкан.
Иницијативата Балканските медицински наменски сили – Balcan Medical Task Force претставува Smart Defence проект и е инициран од Норвешка САД како земји партери, и Србија и Северна Македонија како земји членки. Членки на Иницијативата се и Албанија, Босна и Херцеговина, Словенија и Црна Гора.
