Државниот секретар Елизабета Чуповска-Ристова денеска (25 февруари) во Министерството за одбрана се сретна со амбасадорката на Данска акредитирана за нашата земја, Пернил Далер-Кардел со која разговараше за развојот на одбранбената соработка во духот на сојузништвото помеѓу двете земји – членки на Алијансата.
„Нашите две земји, како членки на Алијансата споделуваат исти цели и вредности – мир, безбедност и демократија. Нашата заедничка посветеност кон безбедноста на секоја педа НАТО територија е уште еден поттик билатералната одбранбена соработка да ја подигнеме на уште повисоко ниво“, рече Чуповска-Ристова на состанокот.
Од потпишувањето на Меморандумот за разбирање помеѓу двете земји во 2010 година, кој е и основа на соработката, Данска го има поддржано развојот на одбраната и Армијата со спонзорства во развојот на армискиот полигон „Криволак“, како и во доменот на информатичката технологија и школувањето на македонски офицери на Балтичкиот одбранбен колеџ.
