Денеска (08.09) во спортската сала „Билјанини Извори“ во Охрид во организација на македонската Армија и Советот на воени спортови во Министерството за одбрана се одржа свечено отворање на 16. регионален „Футсал куп за мир 2026.“
На турнирот покрај македонската екипа, учествуваат и воени спортски екипи од Босна и Херцеговина и Словенија, кои од денеска до 11 септември преку спортот ќе ја промовираат меѓусебната соработка, пријателството и тимскиот дух. Настанот се организира во рамките на активностите на Меѓународниот совет за воени спортови (CISM).
Министерството за одбрана и Армијата ги покануваат сите граѓани како и сите љубители на спортот да ги проследат натпреварите и да бидат дел од оваа регионална спортска манифестација. Влезот за посетителите е бесплатен.
Спортските натпревари кои ќе се одржат денеска од 11 часот, како и на 9 и 11 септември со почеток во 09 часот.
„Футсал куп за мир 2026“ (CISM - Futsal Cup for Peace) е меѓународна спортска иницијатива чии почетоци датираат од 2009 година, со мисија преку спортот да се градат пријателства, меѓусебна доверба и соработка меѓу припадниците на вооружените сили од земјите во регионот.
